Go hlohleletša kgolo ya ekonomi le tlhomo ya mešomo

Dikgwebopotlana di kgatha tema ye bohlokwa nageng efe goba efe ka gobane di ka hlohleletša ekonomi le go fa mešomo. Eupša ge dikgwebo tše nnyane di tsemile medu ditšhabeng tša selegae, di kgatha tema ye bohlokwa le go feta ka go aba dithoto le ditirelo, go tšweletša letseno, go fokotša bodiidi le go tsenya letsogo tlhabollong ya setšhaba.

Le ge go le bjalo, ka manyami dipalopalo di bontšha gore 20% ya dikgwebopotlana di a palelwa mo ngwageng wa mathomo gomme mo e nyakilego go ba seripagare se tla tswalela mejako ya tšona pele di fihla mengwageng ye mehlano. Lebaka le tlwaelegilego kudu la go palelwa gare ga dikgwebopotlana ke go elela ga tšhelete, gomme ge di na le mathata a ditšhelete, bontši bja dikgwebo tše ga di kgone go fihlelela ditšhelete goba dikgetho tše dingwe tša ditšhelete.

Ke ka lebaka le gore Marula Community Chrome (MCC), e šomiša dipoelo tšeo e di hwetšago go tšwa protšekeng ya Makgomo Chrome, e tla be e tsebagatša Protšeke ya Kadimo ya Dikgwebopotlana.

Ka go šoma le setheo sa go adima tšhelete seo se nago le maitemogelo, MCC e tla fa ditharollo tša dikadimo tše di rulagantšwego go thuša dikgwebopotlana le tša magareng (di-SME) ka gare ga ditšhaba tša yona tše tshela tša selegae go phela le go atlega.

Mathomong, nepo e tla ba go thušo ya ditšhelete ya lebaka le lekopana go di-SME tše di lego gona le tše di hlomilwego go di thuša go fihlelela poelo. Ge nako e dutše e eya, bogolo bja protšeke bo ka katološwa go akaretša thušo ya ditšhelete ya dikgwebo tše mpsha tše di thomago tšeo di fihlelelago dikelo tše itšego.

Maemong a mantši, di-SME tše di lego gona di ka nyaka thušo ya ditšhelete go hlama kgopolo ye mpsha, go phethagatša konteraka ye bohlokwa, goba go šomiša sebaka. Pele ga ge go dumelelanwe ka thušo ya ditšhelete le ge go le bjalo, setheo sa go adima tšhelete se tla dira tshepedišo ye e tiilego ya kelo le netefatšo ka ga kgwebo, boetapele bja yona le lebaka la kgopelo ya thušo ya ditšhelete go netefatša gore go na le kgonagalo ye e kwagalago ya katlego.

Ge kgopelo e sa atlege, setheo sa go adima tšhelete se tla fa keletšo le ditšhišinyo tša ka fao go ka kaonafatšwago leano la kgwebo gore dikgopelo tša ka moso tša thušo ya ditšhelete di atlege.

Le gona, beng ba dikgwebo tše dinyenyane gantši ba na le kgopolo e botse ya kgwebo le mmaraka wo o fihlelelwago, eupša ba hloka bokgoni bja kgwebo bjo bo nyakegago bakeng sa go hlola kgwebo e atlegilego, go swana le bokgoni bja go dira goba go kwešiša melao ya motheo ya akhaonto, go šomiša disoftware tša khomphutha goba go šoma ka gare ga melao e itšego . Boemong bjo, kgopelo e ka no se gannwe ka pela eupša go e na le moo mong wa kgwebo a ka romelwa go tlwaetšwa go ithuta mabokgoni ao a nyakegago pele kgopelo e lebelelwa gape ke komiti ya go adima tšhelete.

Protšeke ya Kadimo ya Dikgwebopotlana e tla hlahlwa ke melawana ye e itšego yeo e sepelelanago le nepo ya go thekga kgolo ya ekonomi ya ka nageng le tlhomo ya mešomo. Tše di akaretša:

• Go fetofetoga le maemo le boitlhamelo go hlabolla ditharollo tša dikadimo tša dinyakwa tša moswananoši tša kgwebo ye nngwe le ye nngwe.
• Boikgafo go kgolo le maatlafatšo a borakgwebo ba ka mo nageng.
• Mekgwa ya go adima tšhelete ye e nago le maikarabelo le ya go ya go ile, yeo e kgomarelago ka go tia mekgwa ya kgwebo ya maitshwaro le dinyakwa tša taolo.
• Ditshepetšo tše di šomago gabotse le tše di lego pepeneneng tšeo go lego bonolo go baadimi go di sepelasepela.

“Bjale re fihleletše maemo a godimo a phetogo yeo e lebanego le go kaonafatša maphelo a batho ba rena le go godiša maatlafatšo ya ekonomi. Re holofela gore ka go nolofatša phihlelelo ya ditšhelete go dikgwebopotlana ditšhabeng tša rena tše tshela, re ka thuša go hlohleletša kgolo ya ekonomi ya selegae le tlhomo ya mešomo,” go boletše Oupa Kgoete, Modulasetulo wa Komiti ya Bohlahlobi le Kotsi, MCC.     

Dikgopelo tša thekgo ya ditšhelete di ka dirwa dikantorong tša Zoop Finance ka Ga-Manyaka, Steelpoort le Burgersfort.