Marula Community Chrome e fana ka mokgwa o mongwe wa mohlagase go ditšhaba tša selegae

Marula Community Chrome (MCC) e matlafatša ditšhaba tša selegae ka tharollo ya mohlagase ye e šomago gabotse le ye e sa bitšego kudu.

Nakong ya kgaolo ya mohlagase, ntwa ya gore malapa a sepelelane le mekgwa ya letšatši le letšatši ke ya nnete, kudukudu ditšhabeng tšeo di hlokago.

Ditšhitišo tša ka mehla tša kabo ya mohlagase di dira gore bana ba sekolo ba se kgone go dira mešomo ya gae bošego goba go šomiša didirišwa tša elektroniki go ithuta, gomme malapa a ka se kgone go dira mešomo ya ka gae go swana le go apea, go hlatswa le go aena. Eupša ka manyami, ga se bohle bao ba nago le ditsela tša go tsenya ditharollo tše dingwe tša mohlagase.

Ka go lemoga tlhohlo ye, MCC e thomile go nyakišiša ka ga maemo a mohlagase ka ditšhabeng tše tshela tša Magabaneng, Mohlala (Driekop), Nareng Thokwane, Roka Mashishi, Tswako Mohlala le Bakoni Manyaka, gammogo le ditharollo tše dingwe tše di kgonegago tša mohlagase tšeo di ka tsenywago gabonolo ditšhaba tše.

Dinyakišišo tša MCC di utollotše gore malapa a mantši ka gare ga ditšhaba tše ga a kgone le go lefelela le ditharollo tša motheo tša mohlagase bjalo ka kabo ya go thekga nakong ya tšhitišo ya mohlagase, gomme seo sa ba tlogela ba gakanegile ebile ba nyamile.

Go šoma le ditsebi tša mohlagase le go rarolla dinyakwa tša motheo kudu tša ka gae dinakong tša kgaolo ya mohlagase, MCC e kopantše sephuthelwana sa maatla seo se akaretšago diphanele tša letšatši, diyuniti tša go boloka mohlagase tše di lefišwago, mabone a LED, tjhajara ya mogalathekeng le setofo sa kgase sa dipoleiti tše pedi seo se nago le a silindara ya kgase.

Baamogedi ba thabetše kudu go amogela sephuthelwana se sa maatla, seo se hlomilwego ka magaeng a go lekana 600, ba bolela gore ba rata boiketlo bjo se fago malapa a bona.

Maina a malapa ao a swanetšego go fiwa diphuthelwana a filwe ke balaodi ba Setšo go tšwa go ye nngwe le ye nngwe ya ditšhaba tše tshela gomme a dumeletšwe ke ba Magoši.

Protšeke ye gape e hlotše dibaka tša mešomo le go fa tlhabollo ya mabokgoni go maloko a setšhaba sa selegae ao a hlomilwego ka bokgoni bjo bo nyakegago bja go tsenya le go hlokomela diphanele tša letšatši le ditshepedišo tša go thekga.

”Ye ke tsela ye nngwe fela yeo MCC e thušitšego ditšhaba tša selegae go fihlelela ditirelo tše bohlokwa,” go boletše Morena Oupa Kgoete hlogo ya komiti ya Bohlahlobi le Kotsi. “Re tla tšwela pele go šoma le bakgathatema ba rena ba setšhaba go fana ka thekgo le thušo go malapa moo e nyakegago kudu.”