Marula Community Chrome e fana ka thekgo ye bohlokwa go baithuti ba marematlou ba dipolasa tše nne.

Baithuti ba mphato wa marematlou ba go feta 360 go tšwa dikolong tše tshela tša magareng go ralala le dipolasa tše nne ba swere dikampeng tše bohlokwa tša marematlou tšeo di thekgilwego ka ditšhelete ke Marula Community Chrome (MCC).

Barutwana ba ba mphato wa mafelelo go tšwa Dikolong tša Sekonthari tša Makgamathu, Mohlalamorudi, Makopi, Mokwadibe, Mosedi le Dihlabakela ba hwetša kgodišo ye e okeditšwego go netefatša gore ba dira gabotse ge ba itokišeletša le go dula ditlhahlobo tša bona tša mphato wa marematlou le go kaonafatša dibaka tša bona tša go amogelwa dithutong tša godimo.

Dikampa tša marematlou di fa tikologo ye e bolokegilego, ya mohuta wa sekolo sa bodulo (go dula ka gare), yeo e loketšego go ithuta ka nepo, go efoga ditaba dife goba dife tša leago tšeo di ka šitišago baithuti mo nakong ye bohlokwa. Nakong ya kampa, baithuti ba hwetša dithuto tša tlaleletšo tšeo di thušago go tiišetša kwešišo ya bona ya dithuto tše bohlokwa. Gape ba na le dibaka tša go ithuta ka dihlopha, e lego seo se ba dumelelago go dirišana le go thekgana. Go feta fao, dikampa di fa tlhokomelo ya motho ka noši go fihlelela dinyakwa tše di kgethegilego tša moithuti yo mongwe le yo mongwe, go netefatša gore yo mongwe le yo mongwe o hwetša thušo yeo a e hlokago.

Go tlaleletša, thušo ya ditšhelete go tšwa go MCC e akaretša gape ditshenyagalelo tša dijo, didirišwa tša go hlapa le didirišwa tša go ngwala go baithuti, ditšhelete tša go thuša barutiši, barutišigadi le bašomi ba bangwe, go swana le bahlwekiši le ba tšhireletšo.

Morena M. I. Lekgeu, Hlogo ya Sekolo sa Sekontari sa Mosedi, o hlaloša gore: “Maikemišetšo a magolo ke go kaonafatša mošomo ka kakaretšo le boleng bja diphihlelelo tša baithuti.”

O ke ngwaga wa bobedi ge dikampa tša mphato wa marematlou di rulaganyeditšwe baithuti ba mphato wa marematlou ba selegae, go ya ka katlego ya ngwaga wa 2023. Morena T. M. Manaka, Hlogo ya sekolo sa Sekondari sa Makgamathu, o abelane ka gore kampa ya 2023 e dirile gore sekolo sa gagwe e be se kaone ka go Driekop Circuit. O re ka boikgantšho, “re kgonne go tšweletša tekanyo ya go phasa ya mphato wa marematlou ya 94,8% gomme re nyaka go feta seo re se fihleletšego ka 2023”.

Thekgo ye e laetša bohlokwa bja go kgatha tema ga dikgwebo tša selegae tlhabollong ya setšhaba sa selegae. Marula Community Chrome yeo e laolwago ke setšhaba ke mongdišere go Makgomo Community Chrome gomme e laetšwe go šupa le go phethagatša diprotšeke tšeo di nyakago go phagamiša ditšhaba tše tshela tša selegae.

Oupa Kgoete wa MCC o re, “Seabe se sa MCC se laetša boikgafo bja go godiša dipoelo tša thuto go baithuti ba, go ba fa didirišwa le methopo ye e nyakegago gore ba atlege. Ka go tsepelela go go itokišetša ga bona le go aba tikologo ya thekgo, MCC e holofela go ama gabotse tshepedišo ya bona ya thuto. Mafelelong, maikemišetšo ke go ba thuša go ba ba kaone dithutong tša bona le go fihlelela dipakane tša bona, go bula tsela ya dibaka tše dingwe tša thuto le mešomo ye e atlegilego.”