GO THIBA KAROGANO YA DIJITHALE
Go kgokagana ga e sa le “se se kgahlišago go ba le sona” eupša ke selo seo se nyakegago kudu ge re fetogela lefaseng la dijithale. Lega go le bjalo, ka manyami, batho ba bantši kudu dinagamagaeng le ditšhabeng tšeo di sa fiwego ditirelo tše di lekanego ba dula ba arogane ka gobane ba ka se kgone go lefelela kgokagano ya Inthanete .
Mošomo le thuto di ithekgile kudu ka dikgokagano tša inthanete, gomme re ka phega kgang ya gore ditirišano tša rena tša leago di direga kudu inthaneteng le tšona.
Ke ka lebaka le Marula Community Chrome (MCC) yeo e laolwago ke setšhaba e dumeletše projeke ye e bitšwago “Agang Setshaba”, yeo e ikemišeditšego go fa phihlelelo ya datha ye e sa bitšego kudu, ya maemo a godimo go ditšhaba tše tshela tšeo di dikologilego Makgomo Chrome.
MCC e swere karolo ya 50% ka go Makgomo Chrome gomme e laetšwe go šupa le go phethagatša diprotšeke tša tlhabollo ka gare ga ditšhaba tše tshela ka dipoelo tšeo e di hwetšago go tšwa go projeke ya tshepedišo ya chrome. Balaodi ba yona ba thwetšwe ke ditrasete tše tshela tša setšhaba gomme ba swere maikarabelo a go lebelela ka kopanelo le go tšea sephetho ka ga dikgopelo tša tlhabollo ya setšhaba tšeo di beilwego pele ga bona.
Maitapišo a leago a amogetšwe bjalo ka karolo ya leano le nabilego la tlhabollo ya go ya go ile la ditšhaba tša selegae. MCC e phethagatša “Agang Setshaba” mmogo le moabi wa ditirelo tša inthanete yo a botegago go tsenya tharollo ya lefelo la kopanelo la wi-fi mafelong ao batho ba kgobokanago go ona.
Kgato ya pele (1) e bona mafelo a kopanelo ao a lego dikolong tše tshela go aba ditirelo tša inthanete tša mahala go thuša baithuti ka thuto le go ithuta:
- Dihlabakela High School
- Diketepe Primary School
- Mafete Primary School
- Majoe a Kgoro Primary School
- Mohlalamorudi High School
- Tswako Primary School
Kgato ya bobedi (2) e tla bona go phatlalatšwa mo go nabilego kudu go dikolo tše lesomesenyane (19) ka palomoka gammogo le dipetlele le dikliniki. Gape ga bjale di hwetšwa ka dikgwebong tše nnyane kgauswi le tsela ye kgolo ya R37 go nolofatša phihlelelo ye e nabilego.
Mafelo ka moka a lemogilwe ka morago ga ditherišano tše di tseneletšego le baetapele ba setšhaba le Dikhansele tša Setšo ka gare ga mafelo a go kgoboketša meetse.
Go tlaleletša, maloko a setšhaba a tlwaeditšwe go tsenya didirišwa tša lefelo la bareki (CPE) ka gare ga ditšhaba gomme a tla lefša bakeng sa tlhomo ye nngwe le ye nngwe, ka go realo a hlola mešomo go batho ka gare ga ditšhaba tša rena.
MCC le Makgomo Chrome di dula di ikemišeditše go aba dibaka tša tlhabollo tše di nago le mohola ka gare ga Dipolasa tše Nne, ka tirišano le ditšhaba tše tshela, le go aba dibaka tša nnete tša mešomo kae le kae moo go kgonegago go netefatša khuetšo ya go ya go ile.
