Marula Community Chrome e thekga balemirui ba diruiwa ba selegae
Temothuo ya diruiwa e kgatha tema ye bohlokwa ka diekonomi tša selegae, kudukudu ka dinagamagaeng. Ka manyami, lekala la temo go ralala le naga le lebane le ditlhohlo tše ntši tša go swana le maemo a boso a go feteletša, bolwetši, bohodu, ditshenyegelo tša godimo le go hwetšagala ga furu.
Go hwetšagala ga furu ka sehla go hlohla kudu ge go na le pula ye nnyane le phišo ye kgolo, yeo gantši e lego maitemogelo dikgweding tša go fiša tša selemo ka profenseng ya Limpopo.
Marula Community Chrome (MCC), khamphani yeo e laolwago ke setšhaba yeo e lego mongdišere wa 50% ka Makgomo Chrome, e bontšhitše thekgo ya yona go balemirui ba dikgomo ditšhabeng tše tshela tša selegae ka go hwetša le go aba ditšweletšwa tše bohlokwa go maphelo a diruiwa tša bona ka Dibatsela 2023 le Pherekgong 2024.
MCC e lemogile lenaneo la thekgo ya temo ka therišano le Kgoro ya Temo le Tlhabollo ya Dinagamagae ya Limpopo, Mmasepala wa Selegae wa Fetakgomo Tubatse, le Magoshi a selegae bjalo ka karolo ya boikgafo bja khamphani bja go sepetša tlhabollo ya ekonomi ya selegae le go itshepa go ralala le lefelo la dipolasa tše nne.
Theko le kabo ya dijo tša dikgomo tša boleng bjo bo nyakilego go ba R1,8 milione, dipi le phepo e reretšwe go thekga balemi le go tšwetša pele mothopo wa bona wa letseno mo dinakong tše thata.
“Morero o tee wa MCC ke go otlela boleng bjo bo abelanwago go ditšhaba tša selegae, gomme re dira se ka diprotšeke tša go fapafapana tša go godiša setšhaba,” go boletše Modulasetulo wa MCC, Ngaka Kinesh Pather. “Protšeke ye ke ye nngwe fela ya tše ntši tšeo di laetšago boikgafo bja rena bjo bo tšwelago pele go nepo ye.”
“Temothuo ya dikgomo e bohlokwa kudu ka gobane ke mothopo wa dijo go malapa le ditšhaba, eupša gape ke methopo ya boiphedišo go malapa a mantši kudu ao a dulago Dipolaseng tše nne. Ga go nyakege gore re bolele gore re tla amogela sebaka sa go šoma le mafapha a mmušo wa profense le a masepala go thekga morero wo bjalo wo o swanetšego.”
“Re thabile ka thekgo go tšwa go MCC go balemirui ba dikgomo tše nnyane mo tikologong ya rena,” go boletše Elmon Makofane go tšwa motseng wa Kgoshigadi MW Mohlala.
