Letšatši la DR Nelson Mandela le ketekilwe ka thelelo
GA NKWANA
Metsotso ye masometshela šupa e hlwele e ketekwa mo Apel Taxi Rank ka thelelo. Moletlo wo o rulagantšwe ke ba kgoro ya dinamelwa go tšwa mo probenseng ya Limpopo. Ba kgoro ya dinamelwa go tšwa probenseng ya Limpopo gammogo le borakgwebopotlana ba be ba le gona go tla go thuša go kolomaka Taxi Rank ye ya Apel.
Ba bangwe ba baeng bao ba bego ba le gona go tšwa go kgoro ya dinamelwa ka mono probenseng go akaretšwa Ntate Rakgobadi Moeng, Ntate Phala Lekgetho le Ntate David Rapulana. Ge re boledišana le Ntate Rapulana go tšwa go kgoro ya dinamelwa o hlaolositše ka tsela ye:
“maikemišetšo a rena ke go dira gore lefelo la Taxi Rank le hlweke, le gore batho ge ba tlile ba kgone go bona gore bona le ba renke ke bašomišani. Letšatši le ke le legolo kudu mo lefaseng ka bophara, re ile ra bona e le bokaone gore re tle re le keteke ka mo lefaseng la Ga Sekhukhune ka mokgwa wa go hlwekiṥa mo Renkeng”
Modulasetulo wa Apel Taxi Association e lego Ntate Maleka o hlaolositše gore moletlo wo o beakantšwe ke ba kgoro ya maphelo ka tšhomišano le ba kgoro ya dinamelwa go tla go thuša mo lefelong la rena.
