THUNTŠHA LERWELE MOSADI

Ge fela re ka ikgopotša mantšu a mogale wa tša bokgabo; Eskia Mphahlele, o ile a ngwaya sešo ka gore lemoša le gore fahloša ka mantšu ao a re laelago re le thari ye ntsho, gore go bohlokwa gore re ipobole ka maleme a tswalo.

Pleasure (36) ke morwedi wa Agrineth le Seroanye Maja. Seopedi le mohlatlegi wa mmino wa tša manyalo, gotšwa Tjiane, Ga-Mphahlele, Limpopo.

Le ge go le bjalo, Pleasure; bjalo ka ge a tsebega go bontši bja balatedi ba gagwe, ke motswadi yoo a šegofaditšwego ka barwa ba babedi ka palo. Fao a ilego a nyalwa ke Gobetse Peta. Bjalo ka phorogohlo košeng, o thomile dithuto tša gagwe tša fasana gola Tjiane praemari, kemoka a rema tlou Phutlo sekontari ka ngwaga wa 1996. Ntle le go senya nako, o be a šetše a ikhweleditše lepanta la dithuto tša maemo a godingwana; Diploma (Animal Productions), gotšwa coletšheng ya tša temo Tompi Seleka, seleteng sa Sekhukhune. Ka ge gothwe thuto ke lesedi, seo e be e le nepo ye kgolo go Pleasure, go ya ka moo a ile go a tšweletša kgonthe ya seo ka go se rothiše dinala. Ke ka fao re a ilego a ikhweletša lepanta la (B-Tech Agricultural Management), Unibesithing ya Afrika-Borwa (UNISA).

Pleasure, o šomile lefapheng la sephodisa sa Afrika-Borwa, bjalo ka konstabel. Pele ga ge a tla šomela kgoro ya Rural Development.

Le ge go le bjalo, lerato la gagwe go mmino le be le šetše le metše e bile le kgabakgaba pelong ya gagwe.  “Lerato la mmino le thomile go tloga ge ke sa le leloko la sekolo sa Lamorena, kerekeng ya: Revelation Assembly, ka tlase go pušo ya Bishop Charles Maja; yoo e lego rakgolo” – A realo Pleasure. Le ge Pleasure a godišitšwe ka sedumedi, o ile a ba le kganyogo le bokgoni go koša tša manyalo. O thomile go tšweletša bokgoni bja gagwe ka ngwaga wa 2005 February. Moo a kgonnego go tšweletša kgoboketšo ya mmino wa gagwe yoo o bitšwago: MaAndrews vol 1 (Sheba Nna), ya latelwa ke (Tšhabadimaketše vol 7) _ ka tlase go tlhahlo le thekgo ya Andrew Maakomane le Rufus Mphahlele. Gare ga di kgatišo tše mmalwa, koša tšeo di ilego tša tsebagala le go feta ke; Lefotwana, Laela, Segammetse, Malapa ga a lekane ga mmogo le Sehlephišantepa. Aforika-Borwa ka bophara le bo pepetla, o tla hwetša go kuella molotšana wa gagwe. Go tšwa ditoropong, dikoloing, renkeng ya ditekisi le gohle. Go sa kgathalege gore porofense ke efe. Ge e le mmino wona ga ona gore motho o bolela goba okwa lefe leleme. Ke seo se hwetšagalago mminong wa Pleasure.

Bontši bja batho ba gopola gore dilo tše botse di hwetšagala fela Borwa. Seo se šišinya gore motho ge a nyaka go tšwelela le go tšweletša ditoro tša gwe, o swanetše gore a furalle babo Badimo, e le ge a hudugela Borwa. Ka gorealo, Pleasure o latola nnang ya banyana! “Ke fela

bokgoni le go šoma ka mešegofela; seo se tla phethagatšago ditoro tša gago. Go sa kgathalege gore o go efe Porofense.” – a realo ka bogale. Go matlafatša le go netefefatša mantšu a gagwe, Pleasure o kgonne go itlhamela lefelo la go gatiša mmino wa gagwe: Pleasuretainment and Music Projects. Moo dikoša tša gagwe di kgontšhwago go patlalantšwa Aforika-Borwa ka bophara. Ga bjale Pleasuretaiment e lokolotše ngwana gotšwa popelong: Pleasure vol 9 Makhelwane.

“Thuto ke sebetša se se kaone go lwantšha bodiidi” – o realo.

Moses Shimo Seletisha