Kabo ya mengatwana sekolong se o se phakgamego sa Molebeledi
Ga MASEMOLA
Economic Freedom Fighter le Molebeledi Development Forum gammogo le seyalemoya sa Masemola Community Radio di hlwele di etetše sekolo sa Molebeledi Secondary letšatšing la lesome senyane Moranang ketepedi lesome seswai mabapi le kabo ya mengatwana go barutwana.
Sekolo se se thomile se tsenela ka gare ga tente mengwageng ye meraro ye e fetilego gomme se le ka gare ga Molebeledi primary School. Se thomile ka ngwaga wa seketemakgolosenyane gomme mphato wa marematlou o thomile ke barutiši ba babedi le hloogo ya sekolo. Ga bjalo sekolo se se na le barutwana ba makgolo/lekgolo masomepedi pedi le barutiši ba bahlano. Sekolo se se ka ntlenyana ga masemola.
EFF le Molebeledi Development Forum gammogo le Masemola Community Radio di amogetšwe ka matsogo a mabedi moo di ilego tša aba mengatwana go barutwana. Mme Elizabeth Seroka yoo e le go lekgotlataolo la sekolo(SGB) o hlaolositše ka tsela ye e latelago:
“ Re re e ke e ka ba matšatši ka go latela e se ke ya ba ga lehono feela, ba fela ba etla go tlo aga bana ba rena go tlo ba fahlološa mo dithutong tša bona. Ke kgahlile ke hlohleletšo ya ba Masemola FM mo baneng ba rena ke re o ka re ba ka tla ka mehla le ge ba se ba swara selo.”
Morena Leoke go tšwa go Molebeledi Development Forum o hlaolositše ka bohlokwa bja thuto moo a boletšego gore ga a rate bana gore ba tle ba sokole, ba swanetše go šoma ka maatla ba se tle ba swana le yena ka ge yena e le mootledi wa peesana.
Morena Makabane Mokete go tšwa go EFF le yena o di pšhapšhatlile ka tsela ye e latelago:
“Rena re le ba EFF re e kwa re thabile kudu ka ge re hlohleletša dilo tša mohuta wo re re e ke di ka direga lefaseng ka bopbhara. Re le ba EFF ga se ra lebelela go kgahla setšhaba, re lebeletše feela go thuša setšhaba, re hlohleletša le diforamo tše dingwe le tšona go ka iša seabe.”
Barutwana ba mmalwa le bona ba ntšhitše sa mafahleng a bona ba laetša lethabo le ge re ka se ba ngwale ka moka. Bontle Phaahlamohlaka e le go morutwana sekolong se o boletše ka tsela ye e latelago:
“Ke leboga go menagane ka ge nka se tsoge ke lofile sekolong gape ke tla ikhutša go segwa ke barutwana ba bangwe ge ke itšhaeditše”
